Saturday, January 28, 2012

ကြေကွဲဝမ်းနည်းမိသော နေ့တစ်နေ့

ဒီနေ့ ကျွှန်တော်၏ မွေးနေ့ဖြစ်ပါသည်။ အလွန်ချမ်းသောကြောင့်၊ ဘယ်မှမထွက်ချင်ခဲ့ပါ။ မနက်မိုးလင်းကတည်းက ရေးလက်စ ဘလောဂ်လေးများကို လက်စသပ်ရင်း၊ အခြားသော အခန်းဆက်များကို ရေးရင်း လုပ်လာခဲ့ပါသည်။ နေ့ခင်းပိုင်းလည်းရောက်ရော ညီမလုပ်သူက တစ်ဂျီဂျီနှင့် ရေချိုး၊ အပြင်သွားပြီး ဈေးဝယ်ရအောင်ဆိုပြီး ဂျီတွန်နေပါသဖြင့် စိတ်မပါတပါနှင့် လိုက်ခဲ့ပါသည်။

အီကဲဘုကုရောလည်းရောက်ရော ကျွှန်တော်လည်း စိတ်ဝင်စားတဲ့ ကွန်ပျူတာ အထပ်မှာ ဟိုကြည့် ဒီကြည့်လုပ်ပြီး၊ ကဲ မထူးပါဘူးကွာဆိုပြီး၊ လမ်းဘေးအရက်ဆိုင်လေးမှာ ဘီယာသောက်ရင်း စောင့်နေမိပါသည်။ ယောက်ဖဖြစ်သူကို ခေါ်ရန်စဉ်းစားသော်လည်း၊ တူလေးက အိပ်ပျော်နေပါသဖြင့် ဒီအတိုင်းထားလိုက်ပါသည်။

ဘီယာနှစ်ခွက်လည်း ကုန်ရော ညီမဖြစ်သူထံမှ ဖုန်းလာပြီး ZARA မှာ ဈေးတွေတန်တယ်။ လာဝယ်ဦး ဆိုတာနဲ့၊ လိုက်သွားကြပြီး၊ လက်ရှိရှပ်တစ်ထည်၊ ဖိနပ်တစ်ရံနဲ့ တီရှပ်တစ်ထည် ဝယ်ခဲ့ပါသည်။ ယောက်ဖကတော့ အလုပ်ထဲဝတ်ဖို့ ဘောင်းဘီနှစ်ထည်နဲ့ မြန်မာပြည်ပြန်လျှင် လက်ဆောင်ပေးရန် အချို့ကို ဝယ်ခဲ့ကြပါသည်။ ညီမဖြစ်သူကတော့ ဘာတွေဝယ်ခဲ့မှန်မသိ။

နောက်ဆုံးတော့ အထုပ်၃ထုတ် လက်ကစွဲပြီး၊ အိမ်ဘက်ကိုပြန်ခဲ့ကြပါသည်။ အိမ်နားက ဘူတာအရောက်တွင် ညနေစာကို အပြင်မှာပဲ ရှာဘူရှာဘူ စားခဲ့ကြပါသည်။ စား၍မပြီးသေး၊ တူဖြစ်သူက ဂျီကျပါသဖြင့်၊ သူ့အဖေနဲ့ တစ်ယောက်စီ အပြင်ကို ခေါ်ပြီး ရထားတွေကို ပြရပါတယ်။ ဒီလိုနဲ့ ညနေ ၈ နာရီခွဲလောက်မှာ အိမ်ကို ပြန်ခဲ့ကြပါတယ်။

အိမ်ပြန်ရောက်တော့ တီဗီကြည့်ရင်း၊ ခေတ္တအကြာမှာ Java Swing အပေါ်မှာ မြန်မာယူနီကုဒ်ကို မှန်ကန်စွာ အလုပ်မလုပ်နိုင်ခြင်းနဲ့ ပတ်သက်၍ ရှာဖွေခဲ့ပါတယ်။ ဝမ်းနည်းစရာကောင်းလောက်အောင်ပင် ဇော်ဂျီကိုတော့ မှန်ကန်စွာဖော်ပြနိုင်တာကို တွေ့ရတယ်။ ဇော်ဂျီနဲ့ မြန်မာ၃ နဲ့ ဘာကွာလည်းဆိုတဲ့ အချက်ကို အဓိကထားပြီး ရှာဖွေနေခဲ့တယ်။ ဟိုပြောင်းဒီပြောင်းနဲ့ ရှာဖွေခဲ့သော်လည်း အဖြေကမထွက်ခဲ့ပါ။

ဒါနဲ့ အရင်တစ်ယောက်ယောက်က ရှာထားလေမလား ဆိုပြီး၊ နက်ထဲမှာ Java 2D Myanmar Unicode အစရှိသည့် စာလုံးများဖြင့် ရှာဖွေနေခဲ့မိတယ်။ တော်ရုံနဲ့ အသုံးတည့်မည့် စာများကို မတွေ့ခဲ့ရပါ။ ခေတ္တအကြာမှာ အောက်ပါ လင့်ခ်ကို သွားတွေ့ပါတယ်။

အတော်လေးကို မြန်မာယူနီကုဒ်နဲ့ပတ်သက်ပြီး Java Layout Engine အပေါ်မှာ အသေးစိတ်ကို မေးမြန်းထားတာကို တွေ့ရပါတယ်။ ကျွှန်တော်လည်း အတော်လေးကို ဝမ်းသာမိပါတယ်။ ဆွေးနွေးတိုင်ပင်ရမည့်လူ ကိုတွေ့ပြီဆိုပြီးတော့။

http://web.archiveorange.com/archive/v/LDY2d66rr3j7I77CB1tR

မေးမြန်းထားသူကတော့ Mr Keith Stribley ပဲဖြစ်ပါတယ်။ ကျွှန်တော်လည်း သူနဲ့ ဆက်သွယ်နိုင်ရန်အတွက် သူ့နာမည်နဲ့ နက်ထဲမှာရှာဖွေရင်း၊ သူရေးခဲ့သော ဘလောဂ်များ၊ သံလွင် ဆော့ဖ်ဝဲများအကြောင်းကို တွေ့ခဲ့ရပါတယ်။ ကျွှန်တော် သံလွင်ဆော့ဖ်ဝဲကို အသုံးပြုခဲ့သည်မှာကြာပြီဖြစ်သော်လည်း သူရေးသားထားခဲ့မှန်း မသိခဲ့ပါ။ ကျွှန်တော်လည်း သူရေးထားတဲ့ စာများကို ဖတ်ရင်း၊ သူ့ပရိုဂျက်များကို ကြည့်ရင်း တစ်စထက်တစ်စ လေးစားနေခဲ့မိပါတယ်။

ဟိုရှာဒီရှာလုပ်ရင်းနဲ့ အောက်က လင့်ခ်တစ်ခုကိုပါသွားတွေ့ပါတယ်။

http://mmitpros.ning.com/forum/topics/1445004:Topic:239922?xg_source=activity

၂၀၁၁ခု ၂လပိုင်း ၁၅ရက်နေ့ တွင် ကွယ်လွန်ခဲ့ပြီဖြစ်ကြောင်း သိရှိခဲ့ရတယ်။ ကျွှန်တော်ဘယ်လိုပြောရမလဲ။ ရင်ထဲမှာ တစ်ကယ်ကို ဆို့သွားပါတယ်။ ဝမ်းနည်းမှု့၊ ကြေကွဲမှု့တွေနဲ့ အတူ ကျွှန်တော်တို့ မြန်မာအိုင်တီ လောက အတွက် ကြီးမားသော ဆုံးရှုန်းမှု့ကြီးတစ်ခုဖြစ်ကြောင်း သိရှိခဲ့ရတယ်။

 Mr Keith Stribley အားလေးစားစွာ အလေးပြုမိပါတယ်။ ကောင်းရာသုကတိလားပါစေဗျာ။

လေးစားစွာဖြင့်
မင်းလွင်

Friday, January 13, 2012

Friday 13

ကုဒ်များသည် ဘယ်တော့မှ မလိမ်တတ်ပါ။ ရေးထားသည့်အတိုင်း အလုပ်လုပ်ပါသည်။ လူတွေ ကဲ့သို့ ဟိုယောင်ယောင် ဒီယောင်ယောင် မလုပ်တတ်ပေ။

မနေ့က ၁၃ရက်နေ့ သောကြာနေ့။ မနက် အလုပ်ထဲရောက်ကတည်းက တာကာဟရှိအား ဒီနေ့ Friday 13 ဆိုတော့ ဂျေဆင်များထွက်မလား မသိဘူးလို့ နောက်နေမိသည်။ ၁၀နာရီ အထိ ကျွှန်တော်တို့ ပရိုဂျက်၏ လိုက်ဘရီတာဝန်ကျသူက အလုပ်မလာပါ။ ဒါနဲ့ မနက်ပိုင်း အလုပ်လုပ်စရာ သိပ်မရှိသော ကျွှန်တော်က ဒီမနက် ကွန်ပိုင်းလုပ်ရန် တာဝန်ယူပါသည်။

ဒီနေ့ ကွန်ပိုင်းလုပ်စရာရှိတာလုပ် ပြီးတော့ Test ပတ်ဝင်းကျင်ကို ပြန်တင်၊ ပြီးရင် Server ကို Restart လုပ် ဒါဆိုရင် ပြီးပြီပေါ့ ဆိုပြီး၊ အားလုံးစီကို ၁၁နာရီကနေ ၁၅မိနစ်လောက် ကွန်ပိုင်းလုပ်မည် ဖြစ်သောကြောင့် Test ပတ်ဝင်းကျင်ကို အသုံးမပြုပါရန် မေးလ်လှမ်းပို့လိုက်ပါသည်။ ၁၁နာရီမတိုင်မှီမှာ ကွန်ပိုင်းလုပ်စရာရှိတာကို လုပ်ပါသည်။ အဲ့ဒီအထိ ပြဿနာ မရှိသေးပါ။

၁၁နာရီအရောက်မှာ Tomcat ကို Stop လုပ်ပါသည်။ System Exception တဲ့၊ စပြီ။ ဘာများလဲဆိုပြီး ရှာကြည့်တော့ လိုအပ်သောဖိုင်ကို ရှာမတွေ့ပါတဲ့။ ဖိုင်ကို သွားကြည့်တော့ သူ့နေရာတွင် ရှိပါသည်။ Permission ကို ကြည့်လိုက်တော့မှ သြော် apacheusr နဲ့ လုပ်မှရမည်တဲ့။ start.sh ထဲမှာ အဲ့ဒီလို su တွေ တစ်ခါတည်းလုပ်ထားတာ မဟုတ်ဘူးဆိုပြီး လိုင်ဘရီတာဝန်ခံကို ဆဲလိုက်သေးသည်။

ပြီးတော့ Framework ကို Stop လုပ်သည်၊ မရပါ။ Timeout ကြီးပဲ လာဖြစ်နေသည်။ ဘာ Log မှလည်း မတွက်တာနဲ့ ဒီလောက်တုန်းရလား ဆိုပြီး Framework ကို ထဆဲပြန်သည်။ ပြီးတော့မထူးဘူးဆိုပြီး ps ကွန်မန်းဖြင့် process ကို ရှာပြီး၊ အဲ့ဒီ Process ID ကို kill ရပါသည်။

Message Broker ဖြစ်သော Active MQ ကတော့ လွယ်လွယ်နှင့် ပိတ်ရပါသည်။ အကုန်လုံးကို Restart လုပ်ပြီး စမ်းကြည့်ပါသည်။ အိုကေ အလုပ်လုပ်ပါသည်။ ၁ နာရီ ကြာသွားသည်။ ၁၂နာရီ ထိုးနေပြီ။ ဗိုက်ကတော့ ဆာနေပြီဖြစ်သော်လည်း ၁ရာရီလောက် အခြေအနေ စောင့်ကြည့်ပြီး၊ ပြင်ထားတာတွေကို ပြန်စစ်ဆေးပါသည်။ ကျွှန်တော်ရေးထားသော Simulation က ကောင်းကောင်း အလုပ်မလုပ်ပါ။ ကျွှန်တော်တို့ တာဝန်ယူထားသော Sub System တွင် Simulation သည် အရှုပ်ဆုံးနှင့် အသုံးအများဆုံး ဖြစ်ပါသည်။

Simulation လုပ်ကြည့်သော်လည်း၊ အလုပ်လုပ်ဆဲဟုသာပေါ်ပါသည်။ ဒုက္ခပဲ။ ဘာများမှားပြီလဲဟု Error Log  ကို သွားကြည့်တော့၊ Request ထဲတွင် လိုအပ်သော ပါရာမီတာများ ပါမလာသောကြောင့်၊ Error တက်နေပါသည်။ Error တက်တာတော့ ဟုတ်ပြီ၊ Error တက်ရင်လည်း Error နှင့်ပြီးသည် ဆိုပြီး Status ကို ရေးသင့်သည်ဟုထင်ရင်း Source ကို သွားကြည့်သည်။

finally ထဲတွင် Exception တက်နေပါသည်။ User Info မရှိသောကြောင့် Error File ကို ရေးမရပါ။ သို့ပါသော်လည်း Status က Error ဖြစ်သောကြောင့် End Status ကို ရေးသောအခါ မရှိသော Error File ကိုပါ သွားပြီး သိမ်းသောကြောင့် NullPointerException ဖြစ်နေပါသည်။ နောက်ဆုံး finally ကို ပြန်စဉ်းစားသင့်သည်ဟု ခေါင်းထဲထည့်ရင်း၊ Request မှာ ဘာလို့ Security တွေ မပါရသလဲဆိုပြီး Client ကိုသွားကြည့်ပါသည်။

Client အပိုင်းတွင် ဟိုတစ်ခေါက်တုန်းက မှားဘူးတဲ့ ဖိုင်ကို အသုံးပြုထားသည်ကို တွေ့ရသည်။ တရုပ်စုတ်တွေဟု ဒီကောင်တွေ အလုပ်ကို သေသေချာချာ မလုပ်ဘူး ဆိုပြီး၊ ဆဲပြန်သည်။ တစ်ခါမှားပြီးရင် မှတ်သင့်သည်။ ဘာလို့ နှစ်ခါထပ်မှားသလဲ ဆိုတာ စဉ်းစားလို့မရပါ။ အဲ့ဒါနဲ့ တရုပ်ပြည်က Team Leader ဆီကို အမှားတွေ လာတင်ထားသည်၊ နောက်တခါ ကရုစိုက်ရန်၊ ဘာကြောင့်နှစ်ခါထပ်မှားသည်ကို အကြောင်းရှာရန်နှင့် နောက်မမှားရန် ဘယ်လိုလုပ်မည်ဆိုသည်ကို Procedure ကို ဒီနေ့အတွင်း အကြောင်းပြန်ရန် မေးလ်ပို့ပါသည်။ ၁၄နာရီ ထိုးသွားပြီ။ ဗိုက်ကလည်း တကျုတ်ကျုတ် ဆာနေပြီ။ အဲ့ဒါနဲ့ ထမင်းသွားစားပါသည်။

အပြန်မှာ ကော်ဖီကြမ်းတစ်ခွက်ကို ဝယ်ပြီး အလုပ်ကိုပြန်လာခဲ့ပါသည်။ အလုပ်ရောက်တော့ Project Leader က စောင့်နေပါသည်။ ဘာများဖြစ်လဲပေါ့။ Bank နဲ့ အစည်းအဝေး လုပ်ပြီး၊ Simulation ကို ပြင်ချင်ကြောင်း ပြောလာသည်။ ထင်တော့ထင်ပါသည်၊ အစကတည်းက ဘဏ်တာဝန်ခံကို မေးဘူးပါသည်။ တကယ်ပဲ အားလုံး ဖျက်ပြီး Simulation ကို လုပ်မှာလားဟု။ အဲ့ဒီတုန်းက အားလုံးဖျက်ပြီး အသစ်လုပ်မည်ဟု ခဲ့ပါသည်။ အခုတော့ အားလုံးမဖျက်၊ အခု Simulation လုပ်မည့် အရာများကိုသာ ဖျက်မည်၊ PDF ကတော့ Simulation လုပ်သည့်အရာကိုသာ ထုတ်မည်၊ CSV ကိုတော့ တနေ့စာထုတ်မည်တဲ့။

၃လပိုင်း အကုန်မှာ Release လုပ်မည့်အရာဖြစ်သောကြောင့်၊ အကြီးအကျယ်မပြင်ချင်ပါ။ ဒါပေမယ့် မတတ်နိုင်။ ပြင်ရမည်၊ ဘယ်လောက်ကြာမလဲမှန်းပေးပါပေါ့။ တရုတ်တွေကို ရေးခိုင်းရင် ဟိုမေးဒီမေးနဲ့၊ နှစ်ဘက်လုံး အလုပ်ဖြစ်မည်မဟုတ်၊ ဒါနဲ့ ကျွှန်တော်ပဲရေးရန် ဆုံးဖြတ်ခဲ့ပြီး၊ Leader အား ပိုပိုလိုလို ၄ရက်လောက်တော့ ငါ့ကိုအချိန်ပေးပါဟု၊ စပြီး Class Diagram တွေကို ပြင်ကြည့်ပါသည်။ Test ပြီးပြီးသားဖြစ်သောကြောင့် တတ်နိုင်သလောက် မပြင်ရစေရန် စဉ်းစားပြီး ရေးပါသည်။

၁၈နာရီလောက်မှာ Leader က ရောက်လာပြန်သည်။ Company အချို့က လူတွေ Login လုပ်လို့မရတော့ဘူးတဲ့။ အဲ့ဒါနဲ့ ACL Table က အချက်တွေ ပျောက်နေသည်။ ဘယ်သူကများဖျက် သွားပါလိမ့်ဆိုပြီး၊ မနက်က Backup လုပ်ထားတဲ့ Data နဲ့ Restore လုပ်ပေးပါသည်။ Leader အား Security Data တွေကို မဖျက်မိစေရန် မှာပြီး၊ ကုဒ်များကို ပြင်နေပါသည်။ ဒီနေ့ သောကြာနေ့ဖြစ်သောကြောင့် စဉ်းစားထားတာတွေကို မမေ့စေရန် အပြီးရေးမည် ဟုအားခဲထားပါသည်။

၂၁နာရီခွဲ လောက်အရောက်မှာ Leader က ရောက်လာပြန်သည်။ Framework ကို Restart လုပ်တာ အမှားတွေ တက်နေလို့တဲ့။ Framework မှားနေရင်တော့ တနင်္လာနေ့ မနက်ပိုင်းတစ်ပိုင်းလုံး တရုတ်ပြည်က Tester တွေ ယောင်ကုန်တော့မှာပဲဟုတွေးရင်း။ လူ ၁၀ယောက်၏ တမနက်စာသည် လူတစ်ယောက်၏ ၅ရက်စာမက တန်ပါသည်။ ဒီနေ့တော့ ဒါကိုရှင်းမှပဲဟု၊ Leader အား ကျွှန်တော်က တာဝန်ဆက်ယူမည်ဟု ပြောရင်း၊ ဆာဗာကို Remote Access လုပ်ပြီး၊ Framework Process ကို ကြည့်ပါသည်။ မရှိပါ။ ဒါနဲ့ Framework ကို Start လုပ်ကြည့်ပါသည်။ Component ကို Load လုပ်၍မရပါဟု Message သာထွက်ပါသည်။ သုံးစားလို့မရတဲ့ Message ဟု တွေးရင်း၊ Framework Log ကို သွားကြည့်ပါသည်။

XML ကို လုဒ်လုပ်ရင်း Error တက်နေပုံရ၏။ Framework Properties များကို XML ကို ဖက်ပြီး လိုအပ်သော Component ကို Load လုပ်ရင်း ရှိပြီးသား Component ကို လုဒ်ထပ်လုပ်သဖြင့် Error တက်နေခြင်းဟုသိရပါသည်။ ဒါနဲ့ XML ကို ဖွင့်ကြည့်ပြီး မှားနေသော Component ID ကို Search လုပ်ကြည့်ပါသည်။ ၂ခါ ထပ်ရေးထားခြင်း မရှိပါ၊ ဘာလဲဟ။

ဟိုတခေါက်က Jade နှင့် Reverse Compile လုပ်ထားသော Framework Source များကို ဖွင့်ကြည့်ပါသည်။ လားလား၊ Directory ထဲတွင်ရှိသော XML ဖိုင်အားလုံးကို Load လုပ်နေသောကြောင့် Backup ဖိုင်ကိုပါ Load လုပ်မိ၍ Duplicate ဖြစ်နေခြင်းဟု သိရပါသည်။ ဒါနဲ့ Backup file အား bkk_fw_def.xml မှ fw_def.xml_bkk ဟု ပြင်လိုက်ပါသည်။ Restart လုပ်၍ရသွားပါသည်။ Program Never Lie ဟု တွေးရင်းနာရီ ကြည့်သောအခါ ၂၂နာရီ။ Leader ကို ကြည့်လိုက်သည် အထုပ်ပြင်ပြီးနေပြီ။ တနင်္လာနေ့လုပ်စရာ အရာများကို TODO LIST ထဲမှာရေးပြီး၊ အိမ်ပြန်ခဲ့ပါသည်။

အိမ်ကိုရောက်တော့ ၀နာရီခွဲ။ ဖန်ခွက်ထဲကို ရေခဲအပြည့်ထဲ့ပြီး၊ ဘာဘုံဝီစကီကို လောင်းပြီး၊ ရေမရောပဲ တစ်ကျိုက်မော့လိုက်ပါသည်။ အား Friday 13 ကို ကျော်သွားပြီ။ ဂျေဆင် လည်း ပြန်ပြီထင်ပါသည်။

Saturday, January 7, 2012

Cloudbees for Java Cloud

အခုတလော Cloud အပလီကေးရှင်းများဟာ အလွန်ပင်ခေတ်စားလာတာကို တွေ့ရပါတယ်။ Amazon EC2 က စတင်လိုက်တဲ့ Cloud မုန်တိုင်းဟာ၊ Google Applet Engine ကို အခြေပြု၍ တစ်စထက်တစ်စ ပို၍ ပြင်းထန်လာတာကို တွေ့ရပါတယ်။

GAEj အရောက်မှာတော့ Java ပရိုဂရမ်မာ တစ်ယောက်အနေနဲ့ စမ်းသပ် အသုံးပြု ခဲ့ပါတယ်။ ယခင် ကိုယ်တိုင်ပြင်ဆင် အသုံးပြုရမည် ဆိုလျှင် အတော်လည်းကို လက်ဝင်သည့်ကိစ္စက မိနစ်ပိုင်းအတွင်းမှာ ပြီးဆုံးသွားခြင်း၊ Google ရဲ့ နည်းပညာများကို လွယ်လင့်တကူ အသုံးပြုနိုင်ခြင်း တို့က အရမ်းကို စွဲမက်စရာ ကောင်းခဲ့ပါတယ်။

ဒါပေမယ့် ကြိုက်လား၊ လို့မေးလာခဲ့ရင် အဖြေခက်ခဲ့ပါတယ်။ ဘာကြောင့်လည်းလို့မေးလျှင် GAEj သည် Java EE ပတ်ဝင်းကျင်လို့ ပြောသော်လည်း၊ အသုံးပြုဘူးသော ပတ်ဝင်းကျင်များနဲ့ ထူးခြားလွန်းနေတာကို တွေ့ရတယ်။ ဘာမတူတာလဲ ဆိုတာကိုတော့ အသေးစိတ် ခွဲချမ်းပြီး မလေ့လာရသေးဘူး။ ဒါပေမယ့် အကြောင်းကြောင်းကြောင့် ဆက်ပြီးမသုံးဖြစ်ခဲ့တော့။

သည်လိုနဲ့ ဒီ ၂၀၁၁ခုအကုန်ပိုင်းမှာ Easy JSP ကို ရေးဖို့အတွက် အခြား Cloud ပတ်ဝင်းကျင်တစ်ခုကို ရှာခဲ့မိပါတယ်။ အရင်ကတည်းက စိတ်ဝင်စားခဲ့ပြီး၊ အချိန်မရသောကြောင့် မစမ်းရသေးသော Cloudbees ကို သွားတွေ့ပါတယ်။ ဒါနဲ့ New Account တစ်ခုကို လုပ်ပြီး၊ စတင် စမ်းသပ်ကြည့်ပါတယ်။

Cloudbees မှာ ပံ့ပိုးပေးနေတဲ့ ဆားဗစ်တွေကတော့  Jakens, Repository, Application, Databases များပဲ ဖြစ်ကြတယ်။ Free User တစ်ယောက်အနေနဲ့ Repository အပေါ်မှာ 2G နေရာရပါတယ်။ ပြီးတော့ အပလီကေးရှင်း ၅ခုနဲ့၊ ဒေတာဘေးစ် ကိုလည်း ၅ MB အသုံးပြုနိုင်ပါတယ်။ တော်ရုံ Web အပလီ လေးငါးခုကို အလကား အသုံးပြုနိုင်တာကို တွေ့ရတယ်။


အသုံးပြုသူရဲ့ စာမျက်နှာမှာလည်း လွန်စွာ ရိုးရှင်းတာကို တွေ့ရပါတယ်။ အထက်ပါ ဆားဗစ်များထဲမှ အသုံးပြုလိုတာကို ရေးသားသွားရုံပါပဲ။

Jenkins ဆိုတာကတော့ Agile Developing Process ရဲ့ အသုံးချ နည်းပညာ တစ်ခုဖြစ်တဲ့ continuous integration နည်းပညာကို အသုံးပြုနိုင်တဲ့ ပလတ်ဖောင်း ဆော့ဖ်ဝဲ တစ်မျိုးပါပဲ။ နောင်တစ်ချိန်မှာ လေ့လာရန်လိုအပ် ပေမယ့် လောလောဆယ် အသုံးမလိုသေးတဲ့အတွက် ခဏ ထားလိုက်ပါဦးမယ်။

ပြီးတာနဲ့ Repository အသစ်တစ်ခုကို စပြီး အသစ်တည်ဆောက်ပါတယ်။ GUI ပေါ်ကပဲ Create New Repository ကို နှိပ်ပြီး လိုအပ်တဲ့ အချက်များကို ဖြည့်စွက်သွားရုံပါပဲ။


ပြီးတာနဲ့ Eclipse Plugin ကို အင်စတောလုပ်ပါတယ်။ ပြီးတော့ Cloudbees Application တစ်ခုကို Eclipse ကို အသုံးပြု၍ တည်ဆောက်လိုက်ပါတယ်။ JSP Welcome ဖိုင်တစ်ခုနဲ့ Example Servlet တစ်ခု နမှုနာအနေနဲ့ပါတာနဲ့ Source တွေကို ပြင်မရေးသေးပဲနဲ့ Local မှာ Run ကြည့်ပါတယ်။ အခက်အခဲမရှိ အလုပ်လုပ်တာကို တွေ့ရတယ်။


အိုကေပဲဆိုပြီး၊ Run Cloud ကို စမ်းကြည့်ပါတယ်။ တက်သွားသလိုလိုနဲ့ အလုပ်မလုပ်ပါဘူး။ အပလီကေးရှင်းကို ရှာမတွေ့ဘူးကြီး လုပ်နေတယ်။ ဒါနဲ့ Application ဆားဗစ်ကို သွားရှာကြည့်ပါတယ်။


Application Details ကို ဖွင့်ကြည့်ပြီး၊ Application Log ကို ကြည့်တော့မှ၊ ကွန်ပိုင်းလာ ဗားရှင်းမတူမှန်သိရပါတယ်။ ဒါနဲ့ Eclipse ရဲ့ကွန်ပိုင်းလာ ဗားရှင်းကို JavaSE 6 ကို ရွှေ့ပြီး ပြန်ပြီး Deploy လုပ်တော့ အလုပ်လုပ်တာကို တွေ့ရပါတယ်။



ပြီးတာနဲ့ Database ကို သွားပြီး၊ DB တစ်ခုကို တည်ဆောက်ကြည့်ပါတယ်။ အခက်အခဲမရှိ တည်ဆောက်နိုင်တာကို တွေ့ရပါတယ်။


ဒေတာဘေးစ် ရတာတော့ဟုတ်ပါပြီ။ Table တွေကို ဘယ်လိုရေးမလဲ၊ Data Architecture တွေကို ဒီဇိုင်းရေးရမှာ အလုပ်ရှုပ်တယ် လို့စဉ်းစားရင်း၊ ရုတ်တရက်အတွေးပေါ်မိပါတယ်။ ဒီကောင် MySQL ဆိုတော့ MySQL Workbench ကို သုံးကြည့်မယ် ဆိုပြီး ဒေါင်းလုဒ်လုပ်ပြီး၊ Connect လုပ်ကြည့်ပါတယ်။ အခက်အခဲမရှိ ဆက်သွယ်နိုင်တာကို တွေ့ရတယ်။


Source တွေကို သိမ်းထားနိုင်တဲ့ Repository ရယ်၊ Local Developing ပတ်ဝင်းကျင်ရယ်၊ Running ပတ်ဝင်းကျင်ရယ်၊ DB ပတ်ဝင်းကျင်ရယ် ရှိပြီဆိုလျှင်၊ တော်ရုံတန်ရုံ Java EE အပလီကေးရှင်းတွေကို တည်ဆောက်နိုင်မှာ ဖြစ်ပါတယ်။

ဒါတောင် Jenkins ကို တောင်မသုံးရသေးပါဘူး။ Java Developer တွေ ရင်းနှီးပြီးသားဖြစ်တဲ့၊ Tomcat ရယ် MySql ကို အသုံးပြုထားတာဟာ ဝမ်းသာစရာဖြစ်တယ်။

Cloudbees ကို ကြိုက်လားလို့ ကျွှန်တော့်ကို မေးလာမည် ဆိုလျှင်၊ ချက်ချင်းပင် အရမ်းကြိုက်တယ်လို့ ဖြေမိမှာ အမှန်ပါပဲ။

Cloudbees ကို ဒီမှာရယူနိုင်ပါတယ်။
http://www.cloudbees.com/

Cloudbees ဖြင့် ရေးသားထားသော နမှုနာ အပလီ ဖြစ်ပါတယ်။
http://jsp-tutorials.minlwin.cloudbees.net/

Wednesday, January 4, 2012

Framework များ နှင့် ကခုန်ခြင်း

ကျွှန်တော်သည် ဒီအိုင်တီလောက ထဲကို ရောက်တာ ၆နှစ်ကျော် ၇နှစ် နီးပါးရှိပါပြီ။ အစကတည်းက Enterprise အပလီများနဲ့ အကျိုးပေးသည်ဟုထင်သည်၊ တောက်လျှောက် Enterprise အပလီများနှင့်သာ ကြုံရ၏။ အစမှစရေးသည့် ပရိုဂျက်မှအစ၊ ရှိပြီးသား စစ္စတမ်ကို ပြုပြင်ရေးသည့် နေရာအထိကြုံဖူးပါသည်။ တဖန် အပြောများသည့် Waterfall မှအစ Spiral နှင့် Agile ရေးသားပုံ တို့အထိ မျိုးစုံတွေ့ဘူးခဲ့ပါသည်။

စာအုပ်ရေးတဲ့သူတွေက တော်ကြပါသည်။ Waterfall မကောင်းဘူး၊ ခေတ်နောက်ကျနေပြီ၊ စရေးတဲ့အချိန်ကနေ့ ပြီးတဲ့အချိန်မှာ သုံးတဲ့ လိုအပ်ချက်တွေက ကွာဟလွန်းနေတယ်၊ ဘာညာဆိုပြီး Agile က အကောင်းဆုံးလို့ ထင်ရောင်ထင်မှားဖြစ်အောင် ရေးတတ်ကြပါသည်။ ရှင်းရှင်းပြောရင် Spiral နဲ့ Agile နဲ့ ဘာကွာလို့လဲလို့မေးရင် တိတိကျကျ အဖြေရှိမည်မဟုတ်ပေ။ ဒါပေမယ့် Agile ဆိုတဲ့ စကားလုံးက သစ်တော့အတော်များများက Agile ကို လုပ်ပါတော့သည်။ Waterfall ကိုလည်း ပြီးအောင်မရေးဘူးပဲနဲ့ Suck Waterfall လို့ သံရောင် လိုက်နေသူ တွေလည်း နည်းမည်မဟုတ်။

ကျွှန်တော်ကြုံဘူးသမျှထဲမှာ Agile လောက်ရွဲတာ တစ်ခုမှမရှိ။ အာရှလူမျိုးမှာနှင့် Agileဟာ လိုက်ဖက်မည် မထင်။ အနောက်တိုင်းသားများ၏ လုပ်ပုံကိုင်ပုံနှင့် အရှေ့တိုင်းသားများ၏ လုပ်ပုံကိုင်ပုံသည် ကွာမည် ဟုထင်ပါသည်။ ထားတော့ထားတော့၊ ဒီနေ့က ဒီကိစ္စကို ပြောချင်တာမဟုတ်ပါ။



Framework ဟုကြားလျှင် လူတိုင်းစိတ်ချထားကြပေ လိမ့်မည်။ သူပြောတဲ့အတိုင်း ထရေးရင် တော်ရုံတန်ရုံ အလုပ်တန်းလုပ်နိုင်မည် ဖြစ်၏။ သို့ရာတွင် အတွင်းပိုင်းတွင် လုပ်နေသည်တို့ကို ကျွှန်တော်တို့ စဉ်းစားမိမည် မဟုတ်ပေ။ ကျွှန်တော်တို့ သုံးချင်တာနဲ့ တကယ်ပဲ ကိုက်ရဲ့လား။ ကျွှန်တော်တို့ လုပ်ချင်တဲ့ ပုံစံမျိုးကို တကယ်ပဲ လုပ်ပေးနိုင်လို့လား ဆိုတာ စဉ်းစားရန် အချိန်ပင် ရှိမည်မဟုတ်။

ရေးဟရေးဟ၊ ဆိုပြီး ဘာသံသယ မှမရှိပဲ ထရေးကြမည်ဟု ထင်ပါသည်။ နောက်ဆုံး လုပ်ချင်တာထက်၊ လုပ်လို့ရသည်ကိုသာ လုပ်သွားရသည်ကများမည် ဖြစ်၏။ ကျွှန်တော်တို့ ငယ်ငယ်က ကြားဖူးတဲ့ အရက်သမား အကြောင်းကို ပြန်ကြားမိပါသည်။

လမ်းထိပ်က ငဇော်ပေါ့ကွာ၊ ဒီကောင် အစက အပျော်အပါးနဲ့ သောက်တဲ့ အရက်က အခုတော့ အရက်က သူ့ကိုပြန်သောက်သွားပြီပေါ့ တဲ့။

Framework အသုံးပြုသူများလည်း ဤကဲ့သို့ပင်၊ အစကတော့ သုံးရလွယ်သားဆိုပြီး သုံးရာက နောက်ဆုံးတော့ ဘုမသိဘမသိ Framework ပြောရာ ယုံရတဲ့ ဘဝကို ရောက်မှာကိုယ် ရင်လေးမိပါသည်။ ကျွှန်တော်ကိုယ်တိုင်လည်း လက်တွေ့ကြုံပါတော့သည်။

ကျွှန်တော်တို့ အလုပ်လုပ်ပေးနေသော ဘဏ်ပရိုဂျက်တစ်ခုတွင် ထိုဘဏ်၏ နှစ်ရှည်လများ အသုံးပြုနေသော Framework တစ်ခုရှိပါသည်။ ကျွှန်တော်တို့ ပရိုဂျက်တွင်လည်း ထိုFramework ကို မသုံးမနေ သုံးရန်ဖြစ်လာပါသည်။ အကြောင်းမှာ လက်ရှိ အသုံးပြုနေသည့် ပရိုဂျက်များလည်း အများအပြားရှိခြင်းကြောင့် အယုံအကြည်ရှိခြင်းက အဓိက အချက်ဖြစ်ပါသည်။

လက်ရှိ သုံးနေတဲ့ Framework ဆိုတဲ့ အချက်ဟာ ငြင်းလို့မရအောင် ခိုင်လုံတဲ့ အကြောင်းပြချက် တစ်ခုဖြစ်ပါသည်။ အိုကေ၊ စပြီ။ ရေးကြရေးကြ အားလုံးဝိုင်းရေးကြပါသည်။

ပြီးခါမှ အချို့သော နေရာများမှာ လုပ်ချင်တဲ့ပုံစံ အတိုင်းဖြစ်မနေသည်ကို တွေ့ရပါသည်။

ဟင်ဘယ်လိုဖြစ်တာလဲ?

Document တွေထဲမှာ ဒီလိုရေးရင်ရတယ်ဆို။

အဲ့ဒီအတိုင်းရေးထားတာပဲ။ မှားစရာမှမရှိတာ။ ဒီလိုပဲနေမှာပါပဲ။

အားလုံးလက်လျှော့သွားကြပါသည်။ အဲ့ဒီမှာ မနေနိုင်တဲ့ ကျွှန်တော်က၊ နေဦးလေ၊ ငါတို့ လုပ်ချင်တာ ဒီလိုမှမဟုတ်တာ။ လို့မေးတော့

Framework က ပြောတဲ့အတိုင်းရေးထားတာလေ၊ မှားစရာမရှိဘူး။ ဒီလိုပဲ နေမှာပေါ့တဲ့။

အရီးလေး၊ ငိုရတော့မလို၊ ရယ်ရတော့မလို။ 

Asynchronous Process က ဘယ်လိုကြည့်ကြည့် Synchronous နဲ့ အလုပ်ထလုပ်နေတယ်။ Framework ကလည်း အဲ့ဒီအတိုင်းရေးရမယ်လို့ ပြောထားတယ်။ ယုံပြီပေါ့။

အဲ့ဒီတော့ ဒီကောင်တွေနဲ့ ဆက်မပြောတော့။ ဆက်ပြောရင်လည်းထူးမည် မဟုတ်။

စုပါသည်။ Tools များကို။ Framework က Source မရနိုင်တဲ့အတွက် Class ကနေ Decompile လုပ်နိုင်တဲ့ Jade၊ ပြီးတော့ ကျွှန်တော်အကြိုက်ဆုံး Text Editor Hidemaru။

အခြားလူတွေများနေရင် နားငြီးတာနဲ့ ဒီကနေ့ ဘယ်သူမှအလုပ်မလာတဲ့ အချိန် တစ်နာရီလောက် စောသွားပြီး ရှာပါတော့သည်။ XML Setting တွင် ရေးထားသော ပါရာမီတာက မှားနေပါသည်။ လူအသုံးမများသော Function ဖြစ်သောကြောင့် အကြိမ်ကြိမ် Maintenance လုပ်ရင်း လွဲသွားပုံရ၏။ ပြောပြလိုက်တော့မှ ပြဿနာက ကြီးသွားပါတော့သည်။ လက်ရှိ အမှားကို အမှန်ထင်ပြီး အသုံးပြုနေတဲ့ စစ္စတမ်တွေက မနည်းတော့။ ဒါတောင် နမှုနာတစ်ခု ဖြစ်ပါသည်။

ဒါကြောင့် Framework ဆိုတာနဲ့ အေးဟအေးဟ ဆိုပြီး မယုံကြည်သင့်ကြောင်း သတိပေးလိုပါသည်။


လူသားအားလုံး အမှားနဲ့မကင်းပေ။ 
Framework သည်လည်း ထိုနည်း၎င်း။ 

Tuesday, January 3, 2012

လေသံဖမ်း တရားနာခြင်း

ဒီတစ်ခေါက် ရေးသားမည့် အကြောင်းသည် Java နဲ့ သိပ်မပတ်သက်ပါ။ Rich Client Application များနဲ့ပတ်သက်ပါသည်။ အားလုံး သတိထားပြီး ဖြစ်ပါလိမ့်မည်။ Flash, Flex, Ajex, Silverlight နဲ့ သိပ်ပြီး ခေတ်မစားခဲ့ပေမယ့် ကြိုးစားနေဆဲဖြစ်သော Java FX ဒါတွေအားလုံးဟာ Rich Client Interface Application များအတွက် အသုံးပြုနိုင်သော နည်းပညာများဖြစ်ကြပါသည်။

ကွန်မြူနတီဂိမ်းများကို အစပြု၍ ကြည့်ရင်းကြည့်ရင်း အင်အားကြီးလာတာကို တွေ့ရပါတယ်။ တဖန် iPhone ကို အစပြုပြီး Android နှင့် Windows Phone ဆိုပြီး Client ပိုင်းဆိုင်ရာ အပလီကေးရှင်းများကို အသုံးပြုနိုင်တဲ့ နယ်ပယ်တွေလည်း တဖြည်းဖြည်း များပြားလာပါတယ်။ မည်သူမဆို လွယ်လင့်တကူ အပလီကေရှင်းများကို ရေးသားနိုင်ပြီး ဈေးကွက်ထဲမှာရော၊ မှောင်ခိုထဲမှာပါ ဆော့ဖ်ဝဲပေါင်း များစွာထွက်ပေါ်လာကြပါတယ်။

ဒါပေမယ့် ကျွှန်တော်စဉ်းစားမိတာ ဒီနည်းပညာတွေကို အလုပ်လုပ်စေရန် ပလတ်ဖောင်းကို လိုအပ်ပါတယ်။ ပလတ်ဖောင်းတစ်ခု အတွက်ရေးသားထားတဲ့ အပလီတစ်မျိုးဟာ နောက်ပလတ်ဖောင်းမှာ အလုပ်မလုပ်နိုင်ပါဘူး။ နောက်ပလတ်ဖောင်းပေါ်မှာ အသုံးပြုနိုင်ရန် နောက်တစ်ခါ ပြန်ရေးရပါမယ်။ ဘယ်လောက် စိတ်ပျက်စရာကောင်း သလဲ။ အရင် ဘရောင်ဇာစစ်ပွဲတွေကြောင့် Ajax မော်ဂျူးတွေ အမျိုးပေါင်းများစွာ ထွက်ပေါ်ခဲ့ဘူးပါပြီ။ လမ်းဟောင်းကြီးကို ဆက်လှမ်းနေပြန်ပြီဟု ကြည့်နေခဲ့မိပါသည်။


ဒါပေမယ့် အခုတစ်လော ဒီလမ်းဟောင်းကြီး မကြာခင် ပြီးတော့မည်ဟု ယုံကြည်လာရန် အကြောင်းများကို တွေ့ခဲ့ရပါသည်။ HTML5 ဖြစ်၏။ Tag များကို ဖြည့်စွက်ရုံမက API ကိုလည်း ဖြည့်စွက်လာပါသည်။ ယခင်က ဘရောင်းဇာပေါ်တွင် Animation ကို ရေးရန် Flash, Java, Silverlight အစရှိသည့် ပတ်ဝင်းကျင်ကို ပြင်ဆင်ထားရန်လိုအပ်ခဲ့၏။ တဖန် ပုံရိပ်များကို ရေးသားရန်ဆိုရင်လည်း jpg, gif, png အစရှိသည့် ဖိုင်များကို အသုံးပြုရန် လိုအပ်ခဲ့၏။ Vedio ကို ပြဿရန် Flash Player ကို လိုသည်ဟု ယခုထိ ထင်နေသူများရှိခဲ့၏။ HTML5 တွင် အဆိုပါ အကြောင်းအရာများကို ဘာပလတ်ဖောင်းမှမလိုပဲ ပံ့ပိုးပေးနိုင်မည် ဖြစ်သည်။ တဖန် ကွန်တရိုးများကိုလည်း ရင်းနှီးပြီးဖြစ်သော javascript ဘာသာရပ်ဖြင့် အသုံးပြုနိုင်မည် ဖြစ်၏။

တဖန် HTML Tag အစိတ်အပိုင်းများကိုလည်း CSS3 ကို အသုံးပြုရုံဖြင့်၊ လိုအပ်သလို ဒီဇိုင်းများကို ရေးဆွဲလာနိုင်မည်ဖြစ်၏။ ယနေ့ RIA အပလီများကို ဘာပလတ်ဖောင်းမှ သုံးစရာမလိုပဲ HTML5, CSS3 နှင့် Javascript ဖြင့် ရေးသားနိုင်မည် ဖြစ်၏။ ထို့အပြင် HTML5 ကို ပံ့ပိုးပေးနိုင်သော ဘရောင်ဇာကို အသုံးပြုထားပါက ကွန်ပျူတာပေါ်မှာဖြစ်ဖြစ်၊ iPhone ပေါ်ဖြစ်ဖြစ်၊ Android ပေါ်ဖြစ်ဖြစ်၊ iPad ပေါ်ဖြစ်ဖြစ်၊ Tablet ပေါ်ဖြစ်ဖြစ်၊ သြော်မေ့လို့ windows phone ပေါ်မှာပါ တစ်ခါရေးရုံနှင့် အလုပ်လုပ်နိုင်မည် ဖြစ်သည်။ 

HTML5 သုံး Graphical User Interface အဲဒီတာများသာ ပေါပေါလောလော ထွက်ပေါ်လာပါက၊ အခြားသော RIA များ အလိုလို ပျောက်သွားလိမ့်မည် ဟု ထင်ရပါသည်။ HTML5, CSS3 နှင့် Javascript များကို လေ့လာထားရန် လိုအပ်သည်ဆိုသည်မှာ မှားမည် မဟုတ်ပေ။ 

Sunday, January 1, 2012

၂၀၁၁မှာဘာလုပ်ခဲ့ပြီး ၂၀၁၂မှာ ဘာဆက်လုပ်ဦးမယ်ဆိုတာ

သြော် သည်လိုနဲ့ နှစ်တစ်နှစ် ကူးပြောင်းခဲ့ပြီဖြစ်၏။
၂၀၁၀ခုနှစ်ကစပြီး၊ ပြီးခဲ့တဲ့နှစ်က ဘာလုပ်ခဲ့ပြီး၊ နောက်နှစ်ဘာဆက်လုပ်ဦးမည် ဆိုသည်ကို စဉ်းစားခဲ့မိသည်။
အံ့သြစရာကောင်းလောက်အောင်ပင် ကျွှန်တော်လုပ်ချင်ခဲ့သော အကြောင်းများသည်၊ လေ့လာမည်၊ လေ့လာခဲ့သည်က များပါသည်။
ကျွှန်တော်ကိုယ်တိုင်က လေ့လာခြင်းကို နှစ်သက်ခဲ့ခြင်း ဖြစ်ပါလိမ့်မည်။
သည်လိုနဲ့ ၂၀၁၂အရောက်မှာလည်း ဒီနှစ်ဘာဆက်လုပ်မည် ဆိုသည်ကို စဉ်းစားပါဦးမည်။
ဒီနှစ်မှာတော့ လုပ်ဖြစ်ခဲ့သည့်အရာ၊ မလုပ်ဖြစ်ခဲ့ပဲ ဆက်မလုပ်ချင်တော့သောအရာ။
မလုပ်ဖြစ်ခဲ့၍ ဆက်လုပ်ချင်သည့်အရာနှင့် အသစ်ဆက်လုပ်ရန် ဖြည့်စွက်သည့်အရာဟု ခွဲခြားစဉ်းစားကြည့်ပါမည်။

၂၀၁၁တွင်လုပ်ဖြစ်ခဲ့သည့်အရာများ

  • Java SE 7 ကို လေ့လာခဲ့၏။
  • HTML5 ကို အနည်းငယ် ထိတွေ့လေ့လာခဲ့၏။
  • Google Applet Engine for Java တွင် အပလီကေးရှင်း ရေးသားပုံကို လေ့လာခဲ့၏။
  • Java SE 6 ကိ လေ့လာခဲ့၏။
  • JDO ကို လေ့လာခဲ့၏။
  • Jython အကြောင်းကို လေ့လာခဲ့၏။
  • Ajax နှင့် Servlet ဆက်သွယ်အသုံးပြုပုံကို လေ့လာခဲ့၏။
  • Cloudbees တွင် အပလီကေးရှင်း ရေးသားပုံကို စမ်းသပ်ခဲ့၏။

  • အီးဇီးJava အကြောင်းကို ရေးသားခဲ့၏။ (Myanmar IT Pro & Myanmar Java User)
  • အီးဇီးဆာဗလက် အကြောင်းကို ရေးသားခဲ့၏။  (Myanmar IT Pro & Myanmar Java User)
  • အခြေခံ XMLအကြောင်းကို ရေးသားခဲ့၏။  (Myanmar IT Pro & Myanmar Java User)
  • အခြေခံ DTD အကြောင်းကို ရေးသားခဲ့၏။  (Myanmar IT Pro & Myanmar Java User)
  • အခြေခံ XSLT အကြောင်းကို ရေးသားခဲ့၏။ (Myanmar IT Pro)
  • အခြေခံ DOM အကြောင်းကို ရေးသားခဲ့၏။ (Myanmar IT Pro)
  • Java SE 6 နှင့် ပတ်သက်သည့်အရာများကို ရေးသားခဲ့၏။ (Myanmar IT Pro)
  • Java SE 7 အကြောင်းကို ရေးသားခဲ့၏။ (Myanmar IT Pro & Myanmar Java User)
  • Myanmar Java User Group ကို Facebook ပေါ်တွင် စတင်ခဲ့၏
  • Myanmar Java User Blog ကို စတင်ရေးသားခဲ့၏

  • Zaqzaq Desktop အပလီကေးရှင်းကိုရေးသားခဲ့၏။
  • Redfeather ကို ရေးသားခဲ့၏။
  • JZ2UConverter ကို ရေးသားခဲ့၏။
  • BlackSwan ကို ရေးသားဆဲ။

၂၀၁၁တွင် လုပ်ချင်ခဲ့သော်လည်း ဆက်မလုပ်တော့မည့်အရာများ

  • PHP
  • Java 3D
  • OpenGL

၂၀၁၂တွင် ဆက်လုပ်မည့် အရာများ

  • TCP/IP ကို လေ့လာရန်
  • Websocket ကို လေ့လာရန်
  • Java EE 6 ကို လေ့လာရန်

  • အီးဇီး JSP ကို ရေးသားရန်
  • အခြေခံ UML အကြောင်းကို ရေးသားရန်
  • Java SE 7 အကြောင်းကို ဆက်လက် ရေးသားပါမည်
  • အခြေခံ Java အကြောင်းကို ဆက်လက်ရေးသားပါမည် 

၂၀၁၂တွင်လုပ်ချင်သည့်အကြောင်းအရာများ

  • Database အခြေခံ အကြောင်းကို ရေးသားပါမည်
  • Struts Framework အကြောင်းကိ ရေးသားပါမည်
  • Jakens နင့် Maven2 ကို ပိုင်နိုင်စွာ အသုံးပြုနိုင်အောင် ကြိုးစားပါမည်
  • အသုံးပြုနိုင်သော EMP တစ်ခုကို ရေးသားပါမည်
  • မြန်မာနိုင်ငံနှင့် ပတ်သက်သော အလုပ်များကို လုပ်နိုင်ရန် ကြိုးစားပါမည်
  • နောက်နှစ်နှစ် အတွင်းတွင် မြန်မာပြည်ကို ပြန်ဖြစ်ရန် ကြိုးစားပါမည်။

အားလုံးခြုံကြည့်မည် ဆိုလျှင် ၂၀၁၁ခုနှစ်တွင် ငလျှင်ဖြစ်ချင်း အစရှိသည့် အခြေအနေ အမျိုးမျိုးကြုံတွေ့ခဲ့သော်လည်း လေ့လာစရာတွေ၊ ရေးသားဖြစ်တာတွေ၊ စတင်ခဲ့တာတွေ ရှိခဲ့ပါတယ်။ TCP/IP ကို မလုပ်ဖြစ်ခဲ့ပေမယ့် နောက်နှစ်ဆက်လုပ်ပါမယ်။ PHP ကတော့ လက်လျှော့လိုက်ပြီး Java ဘက်ကိုပဲ ပိုပြီးအားဖြည့်ရန် ဆုံးဖြတ်လိုက်ပါတယ်။

၂၀၁၂မှာတော့ ရေးသားစရာ၊ လေ့လာစရာတွေကို ဆက်လုပ်ရင်း၊ မြန်မာပြည်ပြန်ရန် စီမံကိန်းကိုလည်း ဖြည်းဖြည်းချင်း အကောင်းအထည်ဖော်ရပါမယ်။ နောက်တစ်ခု ကျန်းမာရေးကို ပိုပြီး ဂရုစိုက်ရန် လိုအပ်ပါလိမ့်မယ်။